Belakangan eni banyak kejadian dimane penggune Facebook jadi korban hacker nyang iseng. Tujuannye kaga laen adalah manfaatin akun-akun nyang udah punye banyak temen buat dagangin segale macem jualannye, ada nyang jual perangkat seluler alias hape dan laen-laen dah. Tujuan nyang paling jelek adalah buat ngejelekin pemilik asli akun tersebut, karena begitu diambil alih, maka itu orang bebas nulis seenek bero'nye, kaga peduli lagi etika dan kadang ilang rasa malunye.
Cilakanye, metode nyang dipake para hacker iseng entu lumayan canggih, sehingga kadang-kadang kaga bise diakalain cuman pake sekedar minte RESET password. Trus.. begimane nih.. apa mungkin akun facebook kite masih bise kite ambil alih lagi..? kite coba kemungkinan-kemungkinannye
Cara pertama nyang paling sederhana adalah berusahe reset password, nah ini sepertinye kemungkinannye kecil karena si hacker umumnye pinter, dan biasanye die udah ngerubah alamat email utama dari akun Facebook nyang di Hack. Tapi.. kali-kali ajah itu hacker lupa , belon sempet ganti.. buru-buru dah ganti password begitu ada konfirmasi ke e-mail kite perihal pemulihan password.
Kemungkinan paling jelek, pas email udah diganti, maka kite kaga bise dapet konfirmasi perihal permintaan pemulihan password, tapi masih ada cara laen...
Facebook nyediain halaman kontak untuk membantu kite memulihkan akun nyang di hack orang kaga bertanggung jawab, pertama kunjungin:
http://www.facebook.com/help/contact.php?show_form=account_compromised
Isi formulir tersebut dengan data awal seperti akun yang diambil orang, secara benar, Masukin Nama Lengkap akun Facebook, jangan lupa masukin juga Network/jaringan atau grup grup yang pernah kite masukin, termasuk nama-nama relasi dan kenalan kite sebanyak-banyaknye
Masukin alamat e-mail yang dul dipake buat bikin akun Facebook, yaitu alamat e-mail nyang dipake buat masuk/login ke Facebook
Masukin alamat e-mail baru nyang dipake buat nerima informasi dari permintaan pemulihan Facebook ini
Masukin juga URL alias alamat link dari profil kite nyang udah di hack , setelah itu isi penjelasan dengan deskripsi yang jelas terkait perihal kapan akun kite mulain di hack orang.
Semoga aje dengan cara ini, akun nyang di Hack orang iseng bise kembali dengan selamat.
Kalu udah balik itu akun, pastiin selalu menggunakan jalur aman ( https://facebook.com) buat login ke facebook, pastiin juga password berisi kombinasi huruf dan angka misalnya Ini_PassWord(aye)0k3h , jangan lupa sambungkan akun Facebook dengan nomor hape Seluler buat mempermudah konfirmasi kepemilikan, karena biasanye Facebook akan mengirimkan verifikasi kode melalui jalur hape.
Nah nyang paling penting, jangan jadiin akun Facebook kayak maenan bersama, dalam arti siape aje tau akun ama password.
Semoga buat nyang keilangan masih semangat mencoba mengambil alih kembali, moga bermanfaat..!!!
No comments:
Post a Comment